Este Festival foi o leitmotiv da Asociación Cultural Náufragos do Paradiso desde o seu
nacemento en agosto de 2011. Nesta proposta que cumpre agora 10 anos, a asociación investiu a meirande parte dos recursos humanos e económicos “para cubrir o que considerábamos unha fochanca cultural que había na nosa comarca. Un Festival, sempre de balde, para que todo o mundo o puidese pasar ben”.
Durante máis de dez anos o Festival do Paradiso foi a estrela polar da asociación, que agora coa experiencia atesourada, quere explorar novas actividades culturais e formatos. “Como persoas seguidoras de Quentin Tarantino, queremos emulalo co 0.001% do seu presuposto, parando a nosa carreira coa décima entrega desta saga festivaleira.”
A proposta é hibernar uns meses para reflexionar e no 2024 rexurdir con novas ideas e formatos. Polo que animan aos seguidores a participar na cita de setembro e agradecen a colaboración recibida ata agora. “Vinde porque esta será a derradeira esmorga do Paradiso! Queremos agradecer nesta viaxe ao noso público e todas as persoas que axudaron para que fose posible. Grazas tamén ao fundamental comercio local, ás Administracións públicas que confiaron en nós e a todas as persoas creadoras de contido cultural. Animamos a todas as iniciativas presentes e FUTURAS que aposten e loiten por este marabilloso formato. Isto non será o final… será un novo comezar”, conclúen,
