Catas de viño e degustacións gastronómicas, feiras de artesanía, actividades infantís e concertos foron algunhas das cousas das que puideron gozar as festivaleiras e festivaleiros que quixeron vivir a experiencia Trece Roeis. Entre as bandas e artistas, atopábanse SFDK, Reincidentes, Kaotiko, Lamatumbá, Benito Kamelas, os valenciás Auxili, Tribade, Catuxa Salom, Lucía Aldao, Sofía Espiñeira, Monoulious DOP, TIAM Gz, o leo de matamá, Uxía lambona e a banda molona, Tregua, Enxeito, Tirapralá, The Poet’s Silence ou os pasarrúas da man de Festicultores Troupe e Baturruka, que encamiñaron tanto o venres coma o sábado aos asistentes ao festival ata o espazo #ViveAexperienciaTreceRoeis, lugar de celebración dos concertos de noite.
Dende a asociación cultural Os Trece Roeis, explican que “levamos anos apostando por crear un espazo no que coexistan a música, con especial atención á música en galego, con outras formas de cultura e tradición, coma os obradoiros ou as catas dos viños da nosa Ribeira Sacra e os produtos locais, coa intención de que o festival, tamén sirva para dinamizar o rural”.
Esta cuarta edición puxo de manifesto que “esta aposta é acertada, xa que malia que as inclemencias do tempo forzáronnos a adaptar algunhas das actividades e que este ano era o primeiro no que había entrada cun custo simbólico de 30€ os dous días e 20€ un día, máis de 7.000 persoas viviron a experiencia, o que nos anima a pensar na celebración do noso quinto aniversario en 2024”, afirman dende a organización.
