O salón de actos da Casa de Cultura de Quiroga acolle este domingo, 27 de agosto, ás doce do mediodía, a presentación da curtametraxe “Amor Viaxeiro”. A curta conta a historia de Eugenia, unha anciá que comeza a ter problemas de memoria. Cando a súa neta atopa unhas vellas fotografías da súa mocidade parece recuperar a lucidez. Como terapia, a rapaza decide percorrer os destinos das fotografías replicándoas para estimular os recordos da súa avoa. Parte destas gravacións leváronse a cabo en lugares do municipio como foi a coñecida fervenza de Vieiros.
Sara, Directora de Arte, estará acompañada dos dous directores da curtametraxe, de xefes de son e operadores de cámara, e entre o elenco de actores e actrices, estará alguén moi especial para ela, a súa avoa Carmucha, que se estreou como actriz, traballo, que como afirma Sara, se sentiu “moi a gusto”.
En pouco tempo de vida, a curta percorreu moitos lugares, agora tócalle estrearse en Quiroga. O propio Concello de Quiroga colaborou economicamente na rodaxe.
