A xornada do 13 de novembro no Museo Pazo de Tor estará guiada por Eloísa Pérez Santos, profesora de avaliación psicolóxica da Universidade Complutense de Madrid e investigadora de públicos de museos.

En horario de 10:30 a 18:30 repasaranse claves de avaliación que sinala a xerente da RMPL, Encarna Lago, “a humanización dos datos, a importancia de obxectivos e indicadores ben definidos, o apoio a marcos teóricos ben fundamentados, a procura do rigor, a sustentabilidade e a ética e, sobre todo, a comprensión de que a valoración e o coñecemento do público son unha ferramenta valiosa para reflexionar sobre o museo que queremos conseguir.”

Tomaranse como casos de estudo reais algunha das propostas activas no propio espazo da Rede Museística Provincial de Lugo, ademais de abordar dúbidas e exemplos dos contextos concretos das persoas participantes. O obxectivo é facilitar unha reflexión colectiva sobre o papel dos museos en particular, e da cultura en xeral, no benestar e no desenvolvemento sostible das súas comunidades.

Este módulo formativo está destinado a persoas vinculadas ao ámbito museístico e a outros contextos culturais e de ámbitos próximos, como a mediación social ou a educación, entre outros. A participación é gratuíta, pero as prazas son limitadas, por estrita orde de inscrición na web da RMPL.

Este encontro completa o programa formativo Estratexias de Museoloxía Social 2023. Unha proposta de coñecemento aberto, dirixida a toda a comunidade iberoamericana da Rede Museística e que este ano xirou arredor do lema “Museos, sustentabilidade e benestar”.