Baixo o título de “Regueifas de Bergantiños a Ribas de Sil e a Quiroga“, tivo lugar en San Clodio, o pasado 11 de outubro, unha actuación de improvisación oral que encheu o salón de actos da Casa do Concello de Ribas de Sil.
Roberto Castro, Tenente-Alcalde e Concelleiro de Cultura de Ribas de Sil, e Xosé Manuel Fernández, Concelleiro de Normalización Lingüística do Concello de Quiroga, foron os encargados de presentar a actividade, realizada dentro do ciclo de propostas para fomentar o uso do galego que se incluiron nun Servizo de Normalización Lingüistica creado conxuntamente polos dous municipios.
Lupe Blanco e Suso de Xornes, dous expertos regueifeiros galegos, foron os encargados de entreter á veciñanza dos dous concellos que se achegaron a ver un espectáculo que resultou novidoso para moitas e moitos dos presentes. Aínda así, quedaron encantados, e gozaron non só cos piques entre Lupe e Suso, senon coas referencias retranqueiras que fixeron cara ao público meténdose, sempre con respecto, con eles.
Os regueifeiros chegaron da man da asociación Oral de Galicia e a actividade estivo patrocinada pola Xunta de Galicia que financiou a creación do Servizo de Normalización devandito.
A regueifa é a manifestación máis estendida en Galicia da secular arte popular da improvisación oral en verso, da que se atopan referencias desde a Antiga Grecia. Este feito levou a entidades, como por exemplo ‘Oral de Galicia’, a recuperar esta tradición, difundila con obradoiros e actuacións e incluso colaborar na celebración do Certame Internacional de Improvisación Oral en Verso que organiza en Vigo anualmente o Centro Veciñal e Cultural de Valadares.
