O Concello de Pantón comeza a programación de Nadal co Campamento de Nadal e Reis que se celebrará os días 26,27 e 28 de decembro e os días 2, 3 e 4 de xaneiro. Para participar é necesario inscribirse no Edificio Sociocultural. O día 27 o Salón de Actos do Edificio Sociocultural acollerá ás 11.30 a representación de Cachopo Máxico, por conta de Lila Teatro.
O día 28 celebrarase un obradoiro de Cociña de Nadal, trátase dunha actividade de interacción entre os nenos do Campamento de Nadal e os usuarios do Centro de Día de Pantón. Tamén o 28 de decembro a partir das 20.00 un Concerto Solidario no salón de actos do Edificio Sociocultural. Actuará a Banda Folk de Ribas de Sil. A entrada é libre previa aportación mínima dun quilo de alimentos non perecedoiros.
O 4 de xaneiro a partir das 12.00 no Centro de Día de Pantón actuará o contacontos Iago López e o día 5 a partir das 18.00 celebrarase o Festival de Reis. A cita será no Edificio Sociocultural con xogos, obradoiros de maquillaxe e tatuaxes ata a chegada dos Reis Magos.
Tamén está en marcha o Concurso de Beléns que organiza o Concello. O concurso está aberto a veciños, asociacións e parroquias. Os interesados deben de inscribirse antes do 30 de decembro no Edificio Sociocultural ou chamando ao 982 45 63 77.
E antes do 28 de decembro teñen que presentarse, tamén no Edificio Sociocultural os traballos do Concurso de Postais de Nadal que organiza o Concello. O Concurso está aberto a nenos de entre 3 e 12 anos. O resultado darase a coñecer durante a Festa de Reis do 5 de xaneiro.
