A área de Cultura reforza o programa Tradigalu deste ano, programa que contará cun 350.000 euros de orzamento –100.000 máis que na última anualidade– e que ten como principal obxectivo promover e difundir a música popular e tradicional, fomentando a súa presenza nas programacións musicais e culturais de asociacións e concellos.
A deputada Iria Castro destacou que “ampliamos a dotación do programa, que o ano pasado volveu ter unha gran demanda por parte das asociacións e concellos e que xenera unha parte importante da actividade das agrupacións de música tradicional, fundamentais na conservación do noso patrimonio musical”.
A responsable de Cultura lembrou que “en 2024,Tradigalu permitiu programar máis de 250 actuacións, consolidándose como unha das principais vías de apoio á celebración de festas e celebracións populares nas aldeas e parroquias das distintas comarcas, desde festas patronais ata foliadas, polavilas ou magostos”.
DE INTERESE PARA ACCEDER AO PROGRAMA
As asociacións e colectivos interesados poden consultar as condicións sobre o programa ao detalle na web da Deputación de Lugo e trasladar as súas demandas a área de Cultura a través do enderezo cultura@deputacionlugo.gal. A área de Cultura asume o 80 por cento do custo da actuación. Asociacións, comisións de festas e concellos deben aboar aos grupos o 20 por cento restante.
SOBRE TRADIGALU
Tradigalu é unha iniciativa de carácter itinerante e integradora dentro do ámbito territorial comarcal provincial, pensada para complementar e/ou espallar a programación cultural de natureza musical ás 13 comarcas da provincia de Lugo, xerando sinerxias para o desenvolvemento económico, para a promoción musico-cultural e para fomentar a integración e o benestar social ao permitir o acceso á cultural musical de toda a cidadanía.
Neste Programa poden participar grupos corais, grupos de música tradicional e bandas de música radicadas na provincia de Lugo e cuxas actuacións percorrerán o territorio das 13 comarcas da Provincia.
A área de Cultura da Vicepresidencia da Deputación de Lugo aboará aos grupos participantes o 80% do total do custo das actuacións, sempre que se acredite a realización da actividade. O 20% restante do custe deberá ser asumido polo interesado da actividade, responsabilizándose de facerllo efectivo ao grupo actuante. No caso de que houbese algún incumprimento de carácter económico por parte do interesado, a Deputación só se fará cargo do pago do 80% da aportación económica comprometida.
