O XXXII Certame Municipal de Teatro para centros de ensino de Monforte contará con 7 obras de teatro que se poderán ver do 6 ao 20 de maio de 2025, ambas datas incluídas. Todas as pezas escenificaranse, como é xa costume, ás 20 h. no salón de actos da Casa da Cultura Poeta Lois Pereiro e os centros participantes nesta edición son: Colexio Ferroviario, o CEIP A Gándara, o CEIP de Monforte Colexio Novo, o IES A Pinguela, o IES Río Cabe, a ANPA do CEIP A Gándara, Colexio PP Escolapios.
O concello colaborará cos centros educativos participantes aportando material para a realización da obra por unha cantidade máxima de 200 euros por centro ou asociación, o dobre de aportación que en edicións anteriores, coa intención de incentivar a participación dos centros. Dende o goberno local comentan tamén que esta iniciativa “supón a posibilidade de ofertar unha actividade complementaria ás habituais dos curriculums educativos, altamente valorada pedagoxicamente, polos profesionais do ensino”.
Os premios consistirán na gravación das obras representadas, que serán entregadas aos centros participantes nun lapis de memoria, así como dun diploma acreditativo para cada un dos participantes. A entrega dos galardóns será no Salón de Actos da Casa da Cultura Poeta Lois Pereiro o 26 de maio de 2025 ás 18:00 h.
CENTROS PARTICIPANTES NO XXXII CERTAME MUNICIPAL DE TEATRO
-CEIP de Monforte, coa obra “Ser diferente”, o martes 6 de maio.
-Colexio P. Ferroviario, coa obra “Matilda”, o xoves 8 de maio.
-IES A Pinguela, coa obra “Asasinas a soldo”, o venres 9 de maio.
-IES Río Cabe, coa obra “Xespirando, xoguete cómico para todes”, o luns 12 de maio.
-CEIP A Gándara, coa obra “A muralla”, que se representará o martes 13 de maio.
-ANPA CEIP A Gándara, coa obra “Lingua viva”, o lunes 19 de maio.
-Colexio Padres Escolapios, coa obra “A pantasma de Canterville”, o martes 20 de maio.
