Un orixinal acto organizado pola Fundación Florencio Delgado Gurriarán xuntou aos historiadores Ricardo Gurriarán e Uxío-Breogán Diéguez o pasado sábado para sumarse á conmemoración do Ano Castelao. A proposta consistiu nunha conferencia a bordo dun tren, “revivindo” aquela viaxe que en 1934 emprendeu Florencio Delgado Gurriarán en Monforte para acompañar a Alfonso Rodríguez Castelao cara o seu desterro en Badaxoz, aínda que neste caso a viaxe descorreu só ata a estación de ferrocarril do Barco de Valdeorras e contou, ademais dos relatores, coa presenza dunhas 30 persoas.
A xente que participou en tan simbólica iniciativa puido escoitar o relato sobre ese tempo ofrecido polos historiadores Ricardo Gurriarán e Uxío-Breogán Diéguez. Entre ambos trazaron unha panorámica dende os primeiros contactos de Florencio co galeguismo ata o exilio, na que Castelao foi sempre referente e descrito polo propio Florencio como o guieiro.
RELACIÓN FLORENCIO-CASTELAO
Castelao e Florencio coñecéronse en persoa nunha asamblea do Partido Galeguista en Ourense en xaneiro de 1934 e a súa relación intensificouse durante a Guerra Civil, cando coincidiron no goberno da Segunda República na retagarda en Barcelona. Tamén no exilio, na articulación do movemento cultural e político que conseguiu manter vivo o galeguismo en México e Arxentina, onde recalaron respectivamente trala victoria fascista. Case un século despois, a memoria das súas accións foi analizada nunha xornada que despois de cubrir o traxecto en tren dunha hora, continuou no edificio multiusos do Barco, onde houbo espazo para o coloquio cos asistentes.
VALORACIÓNS
Tanto os conferenciantes coma o público destacaron a singularidade dunha proposta que, segundo destacou Gurriarán: “É posible que sexa a primeira conferencia nun tren en marcha que se ten feito no país”. Uxío-Breogán tamén celebrou a iniciativa, ao considerar que “foi o marco perfecto para falar dun contexto histórico moi relevante” no que se estaba a definir o futuro da autonomía galega. De feito, durante a viaxe, os participantes recibiron un facsímil do Estatuto de Autonomía votado no 36 e refrendado nas Cortes no exilio en 1945. O libro, publicado orixinalmente na Arxentina no anos 40 con comentarios do propio Castelao, foi editado e agasallado á Fundación FDG pola Asociación Galiza Cultura.
