Esta exposición é un proxecto divulgativo que mostra unha descrición cronolóxica dos textos de Castelao en relación coa súa actividade política desde 1934, cando asina os primeiros artigos no desterro estremeño, ata 1944 cando se publica a primeira edición de “Sempre en Galiza” e se funda o Consello de Galiza, goberno galego no exilio do que foi primeiro presidente.
A mostra, inaugurada o pasado 3 de outubro no vestíbulo da Casa da Cultura de Quiroga, exhibe materiais documentais e bibliográficos en oito paneis que resumen o contido da obra máis senlleira do pensamento político de Castelao. No acto de presentación estivo o presidente da Deputación de Lugo, Efrén Castro, e os concelleiros Xosé Manuel Fernández e Mayte Pérez.
A exposición, organizada polas Concellarías de Cultura e Normalización Lingüística do Concello de Quiroga, conta co patrocinio da Área de Cultura de Vicepresidencia da Deputación de Lugo. Poderase visitar no vestíbulo da Casa da Cultura ata o día 15 deste mesmo mes.
Tras a inauguración da exposición, no salón de actos da Casa da Cultura representábase a obra “Cousas” a cargo da Compañía ‘Os Quinquilláns’. Unha divertida versión da obra de Castelao na que estaban presentes grandes temas do texto orixinal como a ecoloxía, a solidariedade, a emigración ou a xustiza social. A montaxe transitaba entre a traxedia, a comedia e a farsa co obxectivo de respectar a lingua, a época e o ambiente do Rianxo natal de Castelao.
