O Concello de Sober na programación deste Nadal convoca un ano máis os certames de Poesía, de Postais, de Beléns e de Decoración de Locais Comerciais. O 2 de decembro presentouse o poemario de José Vicente Barcia, xornalista asentado en Sober e o día 6 tivo lugar o mercadiño de Nadal que organiza a Asociación Veciñal de Bolmente.
O venres, día 12 de decembro, farase a iluminación do alumeado de Nadal e dos beléns, un deles o de Ruperto Álvarez, instalado no Centro Sociocultural, e outro o belén a tamaño natural con pezas de madeira feitas por Eugenio Linares, que se coloca diante da Casa do Concello de Sober.
Belén Sober 2025 / Concello de Sober
O día 13 Rosende celebra a Festa de Santa Lucía, mentres que o 14 a Escola Municipal de Música de Sober convida ao seu Festival de Nadal. A visita de Papá Noel está prevista para o día 19 de decembro, mentres que o día 21 Sergio Alba presenta o seu espectáculo de humor para adultos ‘Dous rombos. Pasa para a cama!’ no Centro Sociocultural. O Trícole ofrece un concerto de panxoliñas o día 26 no local social de Bolmente e o seu espectáculo ‘Os folieiros de lavadores’ na Centro Sociocultural de Sober o día 28.
O 29 de decembro o Goberno local organiza unha festa infantil de Nadal no pavillón do CEIP Plurilingüe Virxe do Carme. O día 30 O Trícole canta os Reis no Centro Sociocultural, nun acto no que se entregarán os premios dos certames de Nadal.
Xa en 2026, o día 2 de xaneiro haberá un concerto de panxoliñas a cargo do Trícole, que percorrerá diversos puntos da localidade, como a residencia da terceira idade, Canaval e Rosende. A programación de Nadal remata o día 5 de xaneiro coa visita dos Reis Magos, que chegarán cargados de agasallos para todos e todas.
