Comeza a fin de semana da festa do Trail Galego, a XI edición do Quiroga Trail Challenge, un evento que organiza o Club de Montaña Montouto en colaboración coa área de deportes do Concello de Quiroga. Trátase dun dos trails máis esixentes e espectaculares do noroeste peninsular e que levará a 1250 corredores a percorrer os montes do Xeoparque Montañas do Courel.

O pavillón municipal foi esta tarde o punto neurálxico do evento, lugar no que tivo lugar a entrega de dorsais. A continuación, e xa no Auditorio Municipal, houbo unha charla técnica a cargo de Blas Rodríguez, director da carreira. Neste punto ultimáronse os detalles da proba e con expectativas dunha climatoloxía favorable para afrontar as duras probas programadas.

O alcalde, José Luis Rivera xunto con varios concelleiros e Roberto Castro, alcalde de Ribas de Sil, daban a benvida e agradecían o traballo a organización e os voluntarios e desexaban os participantes que gozaran de todo o potencial que ofrecen os montes do Xeoparque. O concelleiro de deportes, Antonio Marcos, destacaba tamén que “esta proba está en todos os calendarios a nivel galego e nacional e queremos que siga transcendendo para dar a coñecer o noso precioso territorio”.