O novo presidente do Club, Antonio López, que foi elixido polos socios o pasado sábado 18 de xaneiro de 2025, acudiu á Casa do Concello acompañado da nova directiva para presentarlla ao Alcalde monfortino.
Na xuntanza, na que estivo tamén a Tenente de Alcalde, Gloria Prada, os membros do novo equipo directivo do Club Lemos explicáronlle a José Tomé o seu proxecto de presente e de futuro para esta entidade deportiva, cuxo equipo de fútbol masculino milita actualmente no grupo 1-norte da Preferente Galicia.
O rexedor monfortino manifestou o seu apoio ao club, que se materializa cunha axuda anual de 18.000 euros, e desexoulle á nova directiva e ao seu presidente os maiores éxitos deportivos e de xestión nesta nova etapa que veñen de iniciar á fronte do Club Lemos.
INVESTIMENTOS ANTERIORES
O Concello de Monforte leva investido no campo do Club Lemos, o Campo municipal de fútbol de A Pinguela, a cantidade de 310.000 euros nos últimos anos. Concretamente na renovación do céspede do terreo de xogo, a instalación dunha nova iluminación interior e exterior do campo e das pistas de atletismo, a instalación dun novo videomarcador LED e a recente contratación da renovación dos parasois da grada.
