O Club Quixós desprazábase esta pasada fin de semana ata Portugal para competir na coñecida como Taça Ibérica (Copa Ibérica), unha proba que se celebrou na freguesía de Covas, en Vila Nova de Cerveira, e que este 2026 alcanzaba a súa XVI edición. O sábado 28 de febreiro tiveron lugar as eliminatorias e as semifinais, deixando para o domingo 1 de marzo as finais que alcanzaron gran parte dos deportistas que ían na expedición do club de piragüismo monfortino.
A competición tivo como escenario o fermoso río Coura, na Azenha de Pagade, e a climatoloxía acompañou os dous días con presenza de sol preprimaveral que foi ben recibido pola organización, equipos deportivos participantes, acompañantes e público en xeral.
O Club Quixós fixo un gran papel nesta competición internacional, de carácter ibérico, acadando un 3º posto por equipos e levando a Monforte un total de 9 medallas individuais (5 ouros, 3 pratas e 1 bronce). Todas e todos os integrantes do equipo competiron a gran nivel, se ben só poideron subir ao podio Sara Inés Varela, Noa Díaz, Xoel Fernández, Jose Liñares, Pablo e Santi Díaz.
Na categoría xuvenil, Xoel Fernández acadou 2 ouros: en K-1 e en C-1; en júnior, Sara Inés acadou dúas pratas: en C-1 e en K-1; e na categoría sénior, Noa Díaz foi campiona en K-1 e tamén en C-1. Pola súa banda, e como curiosidade, na categoría de veteranos K-1, subiron ao podio 3 piragüistas do Quixós: Santi Díaz (ouro), Pablo (prata) e Jose Liñares (bronce). Este último amosou especialmente a súa ledicia pois era a primeira vez que conseguía medalla.
