En declaracións a EFE, o presidente do consello regulador, José Manuel Rodríguez, confirmou que as adegas “necesitan un millón de quilos máis de uva” para “cubrir as súas necesidades”, porque “a denominación de orixe está a crecer”. “Creo que nesta colleita pódese chegar a esa cifra. Roldaremos os sete millóns de quilos se non sucede ningunha desgraza co tempo”, dixo Rodríguez, quen lembrou que, polo menos de momento, “a climatoloxía foi favorable” para as cepas e para o desenvolvemento do froito. “Aínda é pronto para dicilo, pero esperamos unha colleita de boa calidade e abundante”, explicou.

Os controis de maduración comezarán a mediados deste mes porque o bo tempo favoreceu que a maduración da uva vaia máis adiantada do habitual. O presidenteda D.O. Ribeira Sacra tamén precisou que as vendas “van moi ben”, de modo que xa non quedará viño sen vender nas adegas cando entre a nova colleita.