Aumento máis que preocupante do paro na zona sur de Lugo. Agás O Incio, Samos e Sober, o resto de concellos aumentaron o número de desempregados.
A Comarca de Lemos suma un total de 1.743 parados/as cun aumento de 63 desempregados; a de Sarria ten agora 1.292, 79 máis; a Comarca de Quiroga alcanza os 296, cun incremento de 4; e Chantada queda con 694, 29 máis que o mes anterior.
Os números por concellos son os seguintes:
Na Comarca de Quiroga: Quiroga 186 (+2), Ribas de Sil 59 (+1) e Folgoso do Courel 51 (+1).
Na Comarca de Chantada: Chantada 512 (+18), Taboada 114 (+7) e Carballedo 68 (+4).
Respecto á Comarca de Lemos: Monforte 1.190 (+44), Bóveda 57 (+3), Pantón 113 (+7), A pobra do Brollón 76 (+3), O Saviñao 183 (+6) e Sober 115, os mesmos que en marzo.
Na Comarca de Sarria: Sarria 936 (+64), O Incio 58 (-2), Láncara 127 (+8), Paradela 51 (+4), O Páramo 41 (+3), Samos 41 (-1) e Triacastela 38 (+3).
Mario Docasar, secretario de acción sindical de CC.OO., afirma que no conxunto das comarcas de Lemos, Chantada e Quiroga contabilízanse 1.807 traballadores que están nun ERTE, situación que alivia e frea a temida “emerxencia social”. Aínda así resúltalle preocupante “a grave situación de centos de familias nas que todos os seus membros están nun ERTE ou cobrando subsidios que en moitos casos son de subsistencia social”. E engade “dende CC.OO. esperamos unha resposta inmediata para sacar este mes a renda mínima vital”. Dende o sindicato calculan que pode haber unhas 2.000 familias que viven das pensións dos pais ou dos avós.
