Un total de 67 proxectos foron rexistrados na web www.sementeribeirasacra.org co obxectivo de participar na VIII edición de Proxectos Empresariais Semente Ribeira Sacra.
O concurso, que fará públicos os 10 finalistas máis o 3 de reserva o vindeiro 20 de xullo, ten como obxectivo estimular ás persoas que teñen unha idea para fomentar o emprendemento conforme ás bases estipuladas. Trala selección dos proxectos, os elixidos terán ata o vindeiro 30 de setembro para achegar a documentación relativa á idea. Finalmente, o 12 de novembro, pola mañá, os finalistas defenderán as súas propostas ante o xurado que logo da deliberación, darán a coñecer os gañadores. Xa pola noite celebrarase a gala de entrega de premios.
Nesta nova edición repartiranse un total de 18.000€ en premios, repartidos en 10.000€ o primeiro premio, 5.000€ o segundo e 3.000€ o terceiro.
A Asociación Semente Monforte nace no ano 2014 trala chuvia de millón que deixou a lotaría de Reis en Monforte de Lemos. Así, algúns dos agraciados co premio crearon o Concurso de Proxectos Empresariais Semente Ribeira Sacra co apoio de institucións públicas e privadas que desexan ver medrar o tecido empresarial do rural. Deste xeito, e co obxetivo de axudar a materializar o proxecto, xa van 7 edicións celebradas deste concurso a través do cal se repartiron máis de 100.000€ en premios.
