O alcalde, José Tomé, sinalou que será un antes e un despois para o futuro crecemento desta zona industrial de Monforte, “trátase dun investimento que permitirá que o Polígono medre industrialmente e, como consecuencia, que haxa tamén un crecemento da actividade económica e de creación de postos de traballo, por tratarse dun servizo básico para que o Polígono funcione con normalidade”. A Confederación Hidrográfica Miño-Sil aportará un 85% da inversión, case 4 millóns de euros (concretamente un total de 3.910.000,00 €), distribuída en 3 anualidades (2023: 490.485,15 €; 2024: 1.793.500,00 €; 2025: 1.626.014,85 €)
Pola súa banda, o Concello aporta o 15%, preto de 230.000 €/ano de media, máis a parcela onde se ubicará a nova depuradora, sendo un total de 690.000,00 € de investimento. A parcela na que se situará esta infraestrutura conta cunha extensión de 5.000 m2, tivo un custe de adquisición de 117.975,00 € (a 19,50 €/ m2 + IVE), e foi comprada a Suelo Empresarial del Atlántico coa previsión de cedela para construír a nova depuradora. A aportación municipal ascende así a un total 807.975,00 €.
Nova depuradora
“A nova depuradora”, explicou o Alcalde “terá capacidade para depurar o actual polígono completo e tamén ás ampliacións que temos en marcha, incluso se duplicáramos o polígono que hai neste momento”. Vai poder funcionar por módulos para que a calidade da depuración sexa a correcta, establecida nos parámetros que marca a lei e vai ter posibilidade de ampliación, xa que estará dispoñible a parcela que ocupa a actual depuradora que son colindantes.
“Con esta obra tamén se vai mellorar moito o medio ambiente, xa que as augas depuradas vanse entubar dende a saída da depuradora do polígono, ata a depuradora de Piñeira, sen ningún vertido, o que significa que o regato do Carballo volverá a ter vida, recuperando o seu estado orixinal”, salientou José Tomé.
Unha vez rematadas as obras, serán recibidas polo Concello que se encargará do seu mantemento no futuro, “con inversións deste tipo, o Polígono de O Reboredo, ten por diante un futuro esperanzador, que xa é unha realidade despois de moitos anos de parálise, agora está en plena fase de crecemento e expansión”, sinalou Tomé.
José Tomé tamén avanzou que “no primeiro semestre espero poder asinar outras inversións en saneamento de moito máis calado, se as conversas e os estudios que está facendo o Ministerio de Transición Ecolóxica finalizan como todos esperamos”.
