O encontro para definir ese plan de acción tivo lugar no Hotel Cardenal de Monforte de Lemos, onde se deron cita medio cento de persoas para coñecer a exposición que desenvolverían Andrés Mazaira Castro, Profesor do Departamento de Organización de Empresas e Marketing da Universidade de Vigo-Ourense (Coordinador do Observatorio Económico Provincial de Ourense) e José Pablo Abeal Vázquez, Profesor do Departamento de Empresa da Universidade da Coruña. Os dous relatores plantexaron as súas propostas e metodoloxías de traballo para debater entre os presentes.
“Falamos de pensar o territorio e que as empresas poidan facer a súa actividade e tamén traballar en conxunto. O sábado comezamos un proceso de participación para definir o que queremos todos os sectores empresariais da Ribeira Sacra”, destacaba Severino Rodríguez, Secretario da Agrupación Empresarial da Ribeira Sacra.
Todo o proceso de elaboración do Plan Director comezará cunha diagnose da situación do territorio Ribeira Sacra e desde ese momento en adiante “Cantos máis sexamos, faremos un plan mellor”, repetiron as Universidades.
As dúas propostas aséntanse nos mesmos piares para sacar adiante un Plan Director realizado sobre o terreo, no que a participación é fundamental para acadar a súa execución e poder conseguir obxectivos:
- Pensar na colectividade, non en individualidades
- As empresas teñen relación con todos os sectores
- Hai valores compartidos por todos sobre os que hai que construír
- Un plan co que temos que ver resultados
- Innovación, sustentabilidade, flexibilidade, colaboración, compromiso
- Participar coa comunidade compartindo coñecemento
- Invertir tempo e traballo
- Monitorizar resultados, avaliar e adaptar
- Hai moitos plans nos caixóns, hai que executalos
Á xornada asistiron empresas de tódolos sectores representados na Agrupación, representantes de entidades colaboradoras, alumnado de materias vinculadas coa temática e outras persoas interesadas. Entre os asistentes, decidiuse nun debate posterior, desenvolver o Plan Director coa Universidade da Coruña, implicando tamén á Universidade Vigo-Ourense. “Ambos transmitiron ilusión. En 16-20 semanas o Plan estará en papel e ao día seguinte comezamos a aplicalo” concluía o Presidente da Agrupación Empresarial Ribeira Sacra Next, Manuel Dacosta.
