O Centro de Interpretación de Moreda do Courel está a organizar do día 18 ao día 23 de xuño, en horario de 11:00 a 13:00 h., unha interesante actividade relacionada coa celebración do San Xoán. Seguindo a tradición, a xente do Courel elabora ramos con diferentes herbas co obxectivo de protexer a casa nesta noite máxica. Daquela, o obradoiro convida aos interesados e interesadas a coñecer as plantas que tradicionalmente se empregan para confeccionar os ‘ramos de San Xoán’.

Para anotarse ou pedir máis información pódese contactar no teléfono 600823416 ou a través do correo electrónico cimoredadocaurel@gmail.com

E xa de cara a final de mes, aqueles que buscan practicar deporte de aventura en plena natureza poden gozar do barranquismo os días 29 e 30 de xuño.

O Xeoparque Mundial da Unesco Montañas do Courel organiza esa fin de semana o I Encontro de Barranquismo en Folgoso do Courel. O sábado 29, tras a recepción de participantes, farase ás 10:30 h. a presentación da “Guía de Barrancos e Canóns – Montañas do Courel Xeoparque Mundial da Unesco”. A continuación, entre as 11:00 e ás 20:00 h.,  realizaranse as actividades nos barrancos e ás 20:30 h. terá lugar a charla “O Xeoparque Mundial da Unesco Montañas do Courel” e a presentación oficial dun vídeo sobre o Xeoparque. A intensa xornada rematará cunha cea de confraternidade ás 21:30 h.

O domingo 30 a actividade céntrase na práctica do barranquismo entre as 9:30 e as 13:00 h. Despois farase un sorteo de material entre os participantes.

A inscrición previa (de balde), e o regulamento que se acepta con ela, na web: https://www.courelmountains.es/eventos