A obra realizarase en 40 metros liñais dos pendellos de cara ao este, por ser os que presentan un maior deterioro.

O obxectivo desta acción restauradora é cambiar por completo a cuberta, que levará madeira de castiñeiro e tella curva tradicional, e acondicionar o chan con xabre tradicional compactado. Tamén se cambiaron xa catro columnas de granito do país que presentaban un alto deterioro.

A obra está cofinanciada por Turismo de Galicia, que achega o 60 por cento, e polo Concello de Sober, que asume o 40 por cento dun orzamento total de 50.000 euros.

As obras están sendo executadas pola empresa local Construcciones Piñeiro e a previsión é que os traballos rematen no mes de novembro.