EFE.- O presidente da Federación de Caza de Lugo, Francisco López, asegurou que o campionato galego de caza do raposo, que se celebrou esta fin de semana en Láncara e Triacastela coa oposición de colectivos animalistas, foi “perfecto” e desenvolveuse en todo momento “coa lei na man”.
En declaracións a Cope Lugo, Francisco López explicou que o campionato se celebrou “sen novidade algunha” e sen incidentes que destacar, xa que só se desprazaron á zona “24 ecoloxistas” para interromper a actividade cinexética. Ademais, dixo, “antes podían interromper unha batida, pero agora non poden facelo” porque “está prohibido”.
En canto ás críticas a este torneo, afirmou que os cazadores xa están “afeitos” ás “mentiras” dos colectivos animalistas e insistiu en que esta proba se desenvolveu “coa lei na man”.
Precisou que a cota de caza nos dous tecores, en Láncara e Triacastela, era de 85 exemplares de raposo para a tempada. Con todo, non se abatera ningún, precisamente para que puidese celebrarse o campionato galego en ambos concellos. De feito, aclarou que no transcurso desta proba só foron abatidos “21 exemplares”, moi lonxe da cota establecida “pola propia administración”, en base “ao plan de ordenación” redactado coa supervisión dos técnicos.
Ao seu xuízo, os colectivos animalistas apóianse “en mentiras” para deostar a práctica cinexética, cando en realidade os cazadores están a realizar un “labor social importante” no control de especies como o xabaril.
