O xeodestino Ribeira Sacra está consolidando a súa oferta turística ao longo do ano, e con este obxectivo de desestacionalización promove dende hai tempo a visita a este territorio con atractivas propostas para vivir o outono.

O pasado 12 de outubro abriron a convocatoria para participar no programa “A caída da folla na Ribeira Sacra. Somos de outono” que pretende ser un escaparate dalgunhas das actividades que se poden realizar en outobro e novembro na Ribeira Sacra con paraxes clásicas, algunhas menos coñecidas e outras que se unen tras a incorporación de novos concellos ao xeodestino.

Dende o Consorcio de Turismo Ribeira Sacra convidan a ver a súa páxina web para coñecer as diferentes actividades programadas e facer as oportunas reservas. En función da demanda e das condicións metereolóxicas, informan que se poderá reforzar o abano de propostas.

O programa está patrocinado polo Plan de Sostibilidade Turística en Ribeira Sacra. Unha das partidas do mesmo estaba reservada a actuacións de promoción para varios concellos da entidade e para os recén incorporados que xa formaban parte do BIC no momento da sinatura do convenio: Chandrexa de Queixa, Manzaneda, A Pobra de Trives e San Xoán de Río.