A Asociación de Desenvolvemento Rural Serra do Caurel vén de rematar un traballo voluntario e colectivo dirixido por Carola Carrot que consistiu na elaboración dun mural no Palco da Música da aldea de Vilamor, no Concello de Folgoso do Courel, a partir de material e técnicas vernáculos.

A actuación forma parte doutras máis que se realizarán para conmemorar o 25 aniversario da Asociación e conta coa colaboración e apoio económico da área de Medio Rural, Mar e Mocidade así como da Deputación de Lugo.

A obra representa as Montañas de Courel no friso e o bosque autóctono de frondosas no mural, destacando o castiñeiro.

En palabras da propia asociación “preténdese que sexa un símbolo do novo Courel tras a vaga de lumes que afectou a serra no verán de 2022”.