“Quitáronnos unha profesora de Pedagoxía Terapéutica e media xornada doutra da mesma especialidade, é dicir, 30 horas menos de apoio directo ao alumnado con necesidades educativas especiais con respecto ao curso pasado”, comenta o profesorado do IES Río Cabe.

As devanditas horas foron reducidas, segundo comentan, “por sorpresa a finais de xullo, e con posterioridade comunicáronnos dende a Consellería que se solucionaría en setembro, pero a día de hoxe non hai solución e ninguén sabe nada sobre este tema”.

Entende o profesorado que tendo maior número de alumnado, e tamén máis alumnado con necesidades educativas especiais, non ten sentido esta redución.

O colectivo de mestres convocou o pasado venres 13 de setembro un claustro extraordinario acordando como medida de presión “concentrarse diante do instituto dende as 11:30 h. ata as 11:40 h. tódolos días desta semana se non hai unha resposta de reposición das PT que se nos quitaron”.