Contactamos con vós dende A MESA Lemos para informarvos dunha actividade que organizamos e que terá lugar este venres 3 de xaneiro no Centro Sociocultural do Concello de Sober ás 17:30 h. Trátase dunha sesión de narración oral a cargo da marabillosa narradora María da Pontragha.
Dende hai uns anos, a delegación da MESA Pola Normalización Lingüística en Lemos e contorna, vén realizando no Nadal diferentes actividades de balde dirixidas á cativada co obxectivo de contribuír á normalización da nosa lingua. A idea é ofrecer a un concello a actividade e que esta sexa rotativa chegando a todos os municipios da contorna. O pasado ano fíxose un contacontos en Bóveda e este ano, concretamente o 3 de xaneiro, a sesión de narración oral chegará a Sober.
ARTISTA E ESPECTÁCULO
María da Pontragha é educadora e antropóloga, dende sempre mantivo un vínculo moi forte coa tradición oral, tanto a través da música coma da palabra en sí. No 2009 comezou a súa andaina no mundo da narración centrándose en todo o que rodea a oralidade.
O espectáculo: Un saco de Contos
Contos e cancións de tradición oral para crianzas. Que beben da nosa herdanza cultural e cos que semento as leiriñas das familias para que medren vizosas.
