A CIG gañou as eleccións sindicais entre o persoal laboral do Concello de Monforte celebradas o pasado venres 21 de xuño. Acadou 2 dos 3 delegados do colexio de especialistas, o único no que presentou candidatura. Isto quere dicir que logrou manter a representación que xa tiña neste órgano.
O outro delegado acadouno a CSIF, quedando UGT sen representación. No colexio de técnicos, repartíronse os dous delegados a escoller entre CSIF e UGT.
A CIG agradeceu nun comunicado a confianza depositada polo persoal laboral do Concello de Monforte na súa candidatura “a pesares da presión exercida pola equipa de goberno“. Tamén reafirmou o seu compromiso coa defensa dos servizos públicos. O sindicato tamén sinalou que os seus retos pasan por eliminar a precariedade dos traballadores e negociar unha RPT.
