O encontro entre esta plataforma e o PP xorde unha vez que a presidenta de Adif, Isabel Pardo de Vera, confirmase que o Executivo non ten previsto executar estas variantes. Trátase dunha decisión “unilateral e que bota por terra os compromisos que deixara proxectados Mariano Rajoy, contemplando dúas variantes, que reducirían ata en 23 minutos o percorrido dos 117 quilómetros que separan por tren ambas as dúas capitais, e cuxa construción permitiría aos lucenses aproveitar a conexión do AVE en Ourense e viaxar a Madrid en pouco máis de tres horas e cuarto.”

Os populares continúan así a rolda de contactos para implicar ao tecido socioeconómico da provincia nunha cuestión que consideran de primeira orde. A este respecto, censuran “o atrevemento” do presidente da Deputación, José Tomé, ao cualificar de “esperpento” as reclamacións dos populares. Dende o PP anuncian que trasladaran estas demandas tamén ao organismo provincial, co fin de acadar o apoio de toda a Corporación.

Os populares aseguran que non poden aceptar as escusas da presidenta de Adif e que o seu obxectivo é acadar o consenso para que o Goberno dea marcha atrás e “deixe de recortar servizos aos lucenses.”