O BNG de Quiroga presenta unha moción pedindo o arranxo da N-120 no trazado que pasa polo Concello, uns 45 quilómetros con firme en moi mal estado, especialmente en determinados tramos. “O estado actual do firme desta estrada é lamentable, presentando un grave deterioro e con moitos tramos nos que hai fochancas de importante consideración. Por poñer un exemplo, o tramo do viaducto do Soldón está xa nun estado de deterioro asfáltico límite, susceptible de provocar avarías e accidentes graves,” sinalan os nacionalistas.
Consideran desde o BNG que as solucións que se adoptan respecto ao deficiente mantemento desta importante estrada do sur de Lugo son provisionais e de ‘parcheo’ e reclaman medidas de conservación máis profundas e duradeiras. Aseguran que coa chegada do inverno, o estado da estrada empeorará aumentando o risco de accidentes.
Por todo elo solicitan que dende o Concello de Quiroga se fagan as xestións oportunas para que o Ministerio de Transportes, Mobilidade e Axencia Urbana realice as actuacións precisas na N-120 ao seu paso polo Concello de Quiroga e que se solicite tamén a mellora estrutural e decidida da estrada N-120. “Unha mellora estrutural e a fondo pensando en convertela nunha vía de comunicación de altas prestacións co obxectivo de desbotar a construción proxectada da A-76, unha autovía que non vai ser a panacea para Quiroga e que non chegaremos a ver con total seguridade moitas e moitos de nós,” recolle a moción nacionalista.
Rogo Montefurado
Despois dunha xuntanza coa veciñanza de Montefurado, os nacionalistas presentan un rogo coas súas demandas: mellorar a arqueta de recollida da auga da traída e que se revise a presión; que se limpen as marxes do ramal que vai da N-120 a Montefurado e que se confirmen anualmente os traballos de limpeza da fosa s´éptica. Piden canalización e desaugue da fonte preto da ponte da vía do tren e que se coloquen 3 árbores na praza principal.
