O alcalde de Quiroga, tras 36 anos á fronte: “É o momento de dar un paso á beira para deixar que xente nova asuma o temón”

alcalde de Quiroga, o popular Julio Álvarez, anunciou este venres que non se presentará á reelección tras levar no cargo 36 anos, desde 1987, con nove maiorías absolutas conseguidas.

A través dun comunicado difundido por contas oficiais do Concello, o rexedor, de 65 anos de idade, confirmou que non tentará ir a por a décima vitoria pola súa xubilación laboral “e unha actividade no mundo empresarial“. “É o momento de dar un paso á beira para deixar que xente nova e con ideas frescas asuma o temón da vida municipal de Quiroga”, explicou.

No actual mandato, Álvarez goberna cunha maioría absoluta de oito concelleiros dos 11 que conforman o pleno municipal, tras acadar o 67,6 % dos votos nos comicios de 2019. Á parte de alcalde, é presidente do PP local, forma parte das executivas autonómicas e provinciais do partido, así como da directiva da Federación Galega de Municipios e Provincias (Fegamp).

Facendo balance do seu paso polo Concello de Quiroga durante máis de tres décadas, considera que deixa ao municipio convertido nunha “pequena cidade” con todos os servizos que ofrece aos 121 núcleos de poboación que o conforman.

Iso si, a retirada de Julio Álvarez será efectiva no momento no que tome posesión a súa substitución na Alcaldía, o próximo mes de xuño de 2023: “Seguirei asumindo as miñas responsabilidades políticas e administrativas ata que haxa un novo equipo de goberno”.

O alcalde conclúe o comunicado agradecendo “profundamente a todos os veciños de Quiroga e ás distintas directivas do Partido Popular provincial e de Galicia (desde Gerardo Fernández Albor ata o actual presidente, Alfonso Rueda) a confianza que depositaron en min durante estes 36 anos”.

Esta decisión, segundo recolle o xornal ‘El Progreso’, xa fora comunicada a pasada fin de semana, durante a tradicional cea de Nadal do PP local da que o propio Concello fíxose eco a través das súas redes sociais oficiais.

Con todo, xa en anteriores ocasións, Julio Álvarez avanzara a súa vontade de pór fin á súa etapa como alcalde de Quiroga.

Ademais, a retirada deste histórico alcalde coincide coa noticia de que un dos seus exconcelleiros, José Luís Rivera, que abandonou a corporación municipal hai dous meses, pretende concorrer ás eleccións de maio cun partido independente, tal e como recolle ‘El Progreso’.

DEIXAR UN COMENTARIO

Please enter your comment!
Please enter your name here