A voceira popular e presidenta do PP de Monforte, Katy Varela, suliña que, aínda que se están levando a cabo obras de mellora desta rede, “os continuos cortes de auga son un problema recorrente desde fai tempo debido á antigüidade das instalacións de abastecemento”. A concelleira alude ás interrupcións do suministro en diferentes rúas do casco urbano, “que se viron afectadas en datas recentes, como foron a rúa de Ourense, O Casar, a rúa Corredoira, a rúa Escultor Francisco Moure, e o barrio da Estación e o Morín”. Esta zona sufriu tres averías importantes en menos dun mes deixando sen auga durante horas a particulares e negocios.

Katy Varela apunta que “despois de oito anos de goberno, o rexedor mostra unha enorme pasividade e vai con atraso na solución deste problema. Asinou un convenio de colaboración coa Confederación Hidrográfica e coa Deputación de Lugo con fondos insuficientes, e que se debe prorrogar cada ano polo atraso da súa execución”.

Varela insta tamén a Tomé Roca para que vele polo cumprimento dos convenios asinados coas institucións e que busque unha solución global a este problema no que participen todas as administracións. “É manifesto que a Xunta de Galicia xa mostrou a súa disposición para colaborar a pesar de que o alcalde de Monforte non fixo caso a esa proposta”, recalca a voceira popular.