O Goberno da Deputación de Lugo publicou as bases dunha nova edición do Plan Único de Cooperación cos Concellos para a anualidade 2023. Dende o Grupo Municipal do PSdeG-PSOE propoñen unha relación de actuacións que consideran necesarias para incluír no Plan Único do Concello do Incio anualidade 2023:
- Muro de contención e acondicionamento de camiño en Vilarxoán.
- Formigonado dos accesos a dúas vivendas en Valbón. (Casa Rosario e Perfe)
- Abastecemento de auga potable ao núcleo de Pacios. (San Salvador)
- Pavimentación dos accesos a Cizán.
- Muro de contención e acondicionamento do acceso á Casa da Campa. (Buxán)
- 2ª Fase mellora de camiño agropecuario no monte de Bardaos.
- Pavimentación de camiños interiores no núcleo de Vilar da Vara.
- Acondicionamento da pista de acceso a San Miguel. (San Pedro do Incio)
- Acondicionamento do acceso á igrexa de Eirexalba e da pista que comunica Vilarreguenga a Ferradal, na mesma parroquia.
En equipamentos propoñen a adquisición de desfibriladores para a súa distribución nos locais sociais das parroquias do Incio. A idea é converter en espazos cardioprotexidos as principais instalacións públicas do municipio. “Só a capital do Incio conta con estes dispositivos, de aí a necesidade de estender estes equipamentos ao resto dos núcleos do municipio”, apuntan os socialistas.
En deportes propoñen a adquisición dun ximnasio portátil con material deportivo. “Unha iniciativa positiva para a cidadanía cuxo obxectivo é fomentar a práctica física ao aire libre, para combater o sedentarismo e promover os seus beneficios como un dos hábitos de vida saudable recomendados para desfrutar e manter a calidade de vida.”
