Despois dos grandes incendios de xullo do pasado na serra do Courel, “conselleiros, delegados e presidentes anunciaron axudas para a Serra usando o Courel para promocionarse e dando unha falsa imaxe de apoio neses momentos tan difíciles”, lembran desde Caurel Vivo. 

Ardeu case o 60% do Concello e 9 meses despois a realidade é “que poucas foron as axudas que chegaron, só algunha migalla para afectados directos en vivendas. Pero, e os afectados no turismo, apicultura, gandeira, autónomos  e donos das terras? O único que recibiron foron doazóns de particulares”, denuncia Caurel Vivo.

Este mesmo ano anunciouse a reforestación de zonas por parte da Xunta que é a que ten as competencias en Montes. Caurel Vivo asegura que “o único  que se plantou foi de forma altruísta por parte da veciñanza e voluntarios, con doazóns de castiñeiros e froiteiras”, e engaden, “estamos case un ano máis tarde do desastre e podemos ver como a meirande parte da palla que a Xunta usou para sacar a foto podrece nas cunetas.”  

Desde C@urel Vivo consideran que “unha vez máis se malgasta diñeiro público” e pregúntanse, “A que intereses responden as Administracións, ós intereses xerais ou ós duns poucos?”.