O voceiro municipal do PSdeG, Miguel Ángel Fernández, subliña que a rexedora do PP, tamén Xefa Territorial de Medio Rural da Xunta de Galicia, leva 12 anos á fronte do Goberno local “saltándose todos os procedementos que regulan a aprobación dos presupostos, das liquidacións e da Conta Xeral, facendo deste xeito unha xestión neglixente e caótica dos cartos públicos, que son de toda a veciñanza”.

Este 2023 en Triacastela levouse a pleno este xoves, o orzamento do presente exercizo. Miguel Ángel Fernández explica que votou en contra “por estar fóra de prazo e non ter ningún sentido. Parece unha inocentada polo Día dos Inocentes, que podería ata ser simpática, se non fose polas graves consecuencias que pode chegar a ter para os veciños”.

Tamén esixiu que se presente para xaneiro, a aprobación inicial, o orzamento do exercizo 2024 e antes do 15 de outubro se presente o presuposto do 2025 para que poida ser aprobado definitivamente antes do 31 de decembro de 2024, tal e como marca a lexislación vixente. Segundo os socialistas, ademais de levar os orzamentos a pleno fóra de prazo, “a alcaldesa do PP incumpre tamén o procedemento porque non os publica no Boletín Oficial da Provincia para a súa exposición pública e que os veciños poidan presentar alegacións durante un período de 15 días”. Conclúen asegurando que a rexedora tamén vulnera o establecido para a aprobación das liquidacións dos propios presupostos.