Por Chantada considera que estes espazos deberán estar ao dispor das agrupacións e/ou persoas que o soliciten, cun horario amplo para facilitar o aproveitamento por parte do maior número posíbel delas, e organizado e dispoñíbel baixo os principios de confianza e responsabilidade da veciñanza.

Ao tempo, a moción aposta pola creación dunha bolsa de agrupacións culturais (musicais, teatrais, literarias…) que tiveran interese en ter proxección pública e ser contratadas polo Concello como parte da Axenda Cultural da vila.

Defende a fundamentación do documento presentado por Por Chantada que “as asociacións e agrupacións culturais -e mesmo as persoas non organizadas que traballan na arte e na creación- teñen unha saudábel representación na nosa vila malia contar con escaso apoio institucional”. E que a indiscutíbel competencia das entidades locais na difusión e promoción cultural, “pasa por traballar nunha oferta cultural variada e coordinada, ao tempo que se facilita que as veciñas e veciños da nosa vila teñan posibilidades de formación e de creación cultural. E pasa, en definitiva, por democratizar a cultura”.

Defenden as promotoras da candidatura independente que “Un concello comprometido cos valores democráticos quere e promove un tecido asociativo forte”. Non descarta a agrupación municipal que ese espazo poida ser nun futuro a actual casa da cultura, cando se traslade a actual biblioteca, “mais non se pecha nunha localización concreta e urxe, pola contra, a que se habilite canto antes”.