A organización nacionalista escolleu a Iago Suárez como o novo responsable local. De 27 anos de idade, veciño de Chantada e tradutor de profesión, actualmente é deputado polo BNG no Parlamento galego, cargo para o que foi escollido nas eleccións galegas do pasado 18 de febreiro.

Suárez vén formando parte das candidaturas do BNG de Chantada nas eleccións municipais desde 2019 e ata hai uns meses era o responsable de Galiza Nova, a organización xuvenil do BNG, no sur de Lugo.

Sobre a súa nova responsabilidade no BNG de Chantada o deputado nacionalista asegura que “é unha honra que as compañeiras e os compañeiros me escollesen como o seu novo responsable local. Afronto o reto con ilusión e con moitas ganas de traballar por Chantada se cabe aínda con máis forza”.

O principal obxectivo, asegura o novo responsable local, é “volver facer parte da corporación e para iso, asegura comezamos a traballar desde xa as vindeiras eleccións municipais”. “Vimos de tempos complicados, pero o BNG está nun momento excelente e en Chantada contamos cun grupo humano marabilloso co que vimos traballando estes anos para o noso concello mesmo fóra do Concello”. Así Suárez destaca que fará “todo o posible por levar as reivindicacións de Chantada ao Parlamento onde, entre outras cousas, xa conseguimos o acordo para que se faga un novo campo de fútbol e onde vimos reclamando
maior investimento para o noso concello”.

“Un BNG forte é a mellor garantía de que as necesidades da veciñanza se escoitan nas institucións, xa sexa nos concellos ou no Parlamento, por iso traballamos desde xa cara a ese obxectivo”, finaliza Iago Suárez.