Por Chantada – Interior Galego Vivo manifesta a súa oposición á construción dun macroparque eólico de tramitación estatal en Chantada. Afirman que o expediente está cheo de erros, “por exemplo localizando os muíños e parcelas de Ludeiro, a Lagoa ou Pereira no concello de Carballedo. Tampouco pediron a declaración de interese público co obxectivo de que as persoas proprietarias non se decaten desta primeira exposición e non aleguen”.
Explican que este macroproxecto vén desde Forcarei cunha vía de evacuación que seguirá ata Castrelo de Miño, “Un proxecto feito desde Madrid por empresas de capital especulativo e fondos de investimento que non ten en conta os lugares e as explotaciós da zona, contribuíndo ao proceso de baleiramento demográfico e comprometendo o sector primario e o turismo”.
Neste momento está aberto o período de alegaciós, tendo en conta que foi publicado no BOP o 2 de xuño, hai un mes para alegar. O sábado, 14 de xuño, hai un acto informativo convocado pola plataforma veciñal Observatorio Enerxético Local no local social de Santa Uxía de Asma.
“O Alto de Ramos e as parroquias de Vilaúxe, Pereira, Santa Uxía, Esmoriz e Bermún non poden ser territorios de sacrificio cando Chantada e Carballedo xa contribúen notabelmente á produción eléctrica cos encoros de Belesar e Peares ou co parque do Faro”, aseguran.
IGV lamenta a “complicidade dos alcaldes de Carballedo e Chantada que deberían estar informando á veciñanza” e conclúen, “con este e outros proxectos estase paseniño expopriando de facto a Terra que durante séculos traballamos as familias que hoxe, a pesar de todo, aínda habitamos o territorio”.
