Os populares instan ao Ministerio e ao Executivo estatal “a que deixe de ignorar as súas competencias” e garanta o acceso a Internet ao longo do territorio galego, así como a cobertura telefónica en condicións de calidade, con solucións técnicas que atendan ás complexas características orográficas e poboacionais destes municipios rurais e montañosos.
Explican que nos últimos meses as queixas da veciñanza de Quiroga, Ribas de Sil e Folgoso do Courel non deixan de multiplicarse ante o mal funcionamento do servizo telefónico e o insuficiente despregue da fibra óptica. Existen territorios practicamente illados e fronte aos que “o Goberno de Sánchez non sabe ou non quere ofrecer solucións”.
Os senadores din que estes problemas repercuten de forma negativa aos veciños e lastran significativamente o desenvolvemento económico, a actividade laboral, comercial e industrial destes municipios. De feito, cada vez se reportan máis problemas de cobertura á hora de establecer unha chamada desde un dispositivo móbil ou simplemente para conectarse a internet desde eses mesmos aparellos. Como é lóxico, estes inconvenientes supoñen tamén unha limitación para particulares, estudantes e negocios que utilizan a conexión de datos para as súas actividades diarias.
Desde o PP lembran que o Goberno de España e, en particular o Ministerio para a Transformación Dixital, é a única autoridade con competencia en todo o relativo ás conexións a Internet e telefonía móbil, pero ademais conta con fondos suficientes, “o Programa ÚNICO que pon a disposición do Ministerio un financiamento de máis de 4.300 millóns de euros precisamente para universalizar as infraestruturas dixitais e a cohesión territorial”.
