• A moción denuncia situacións como o atasco dunha caravana na baixada de Xabrega, a saturación de vehículos no embarcadeiro de Doade e nos Chancís, ou o perigo en pistas de ribeira onde “dificilmente pasan dous coches se se cruzan”. Lamentan que “a propaganda da candidatura da Ribeira Sacra a Patrimonio Mundial casa pouco coa escasa preocupación polas infraestruturas básicas. A pesar de existir un Plan de Sostibilidade Turística cunha partida significativa para mobilidade, a realidade mostra unha falta de execución e transparencia preocupante”.

Agroma Sober – IGV propón unha batería de 16 medidas concretas que inclúen:

• Un plan de choque para as estradas: Impulsar sen demora o arranxo das vías municipais e provinciais, e esixir á Deputación a planificación xunto cos concellos, de xeito equitativo, da reparación das estradas municipais con axuda do parque móbil provincial.
• Revisión e remodelación da sinalización: Actualizar a cartelería turística e de adegas e regular a sinaléctica privada para evitar confusións.
• Xestión intelixente dos fluxos: Prohibir o paso a non residentes en pistas perigosas, crear zonas de aparcadoiro para autocaravanas e instalar badéns en puntos conflitivos.
• Modernización e conectividade: Incluír indicacións precisas sobre o estado das estradas na información turística e revisar as rutas de Google Maps, así como impulsar accións de mapeo en tempo real e actuación en rede das oficinas de turismo.
• Transparencia e planificación: Esixir ao Consorcio de Turismo da Ribeira Sacra información detallada sobre o estado de execución do Plan de Sostibilidade Turística.

A voceira de Agroma Sober – IGV, Paula Vázquez Verao, destaca que “Sober ten un potencial inmenso para un turismo que xere alto valor económico e social, pero para aproveitalo e xerar emprego de calidade necesitamos infraestruturas á altura. Non podemos permitir que a falta de mantemento e a improvisación afasten a visitantes e poñan en perigo a nosa xente. As nosas propostas buscan converter Sober nun destino intelixente, seguro e sostible, onde o turismo sexa un motor de desenvolvemento real e non colisione cos intereses da veciñanza”.