Cos seguros de 2018, permisos de navegabilidade do 2018 e ITBs con vixencia dende 2018 e ata 2021 na man, Eduardo Vidal acusou ao PP de mentir e calumniar e pediulle que rectifique “por todo o dano ocasionado” ou acode á xustiza. Sae así ao paso das denuncias feitas polo PP despois do pasado pleno provincial, sobre o servizo de catamaráns.
Segundo Vidal, o Partido Popular está a danar a imaxe e o valor do servizo de catamaráns, que atrae a numerosos visitantes á provincia, “á Ribeira Sacra en particular, a 60.000 persoas, como o fixo o ano pasado”, apunta.
Engade, ademáis, que as denuncias dos populares tamén fan que os usuarios dos catamaráns teñan dúbidas sobre a súa seguridade, “60.000 persoas ás que o Partido Popular lle fixo dubidar sobre a súa seguridade, ao igual que a todas as que teñan feito as súas reservas ou teñan intencións de viaxar nos cataramáns e visitar a Ribeira Sacra”.
Segundo Eduardo Vidal, as denuncias do PP son unha irresponsabilidade e fan dano á provincia, “van moito máis alá do dano ou desprestixio que lle poidan causar a miña persoa ou ao Goberno da Deputación. Agardo que o Partido Popular rectifique publicamente. Se non o fai, emprenderei todas as medidas legais posibles.
