A cita dos 200 xeopícaros desenvólvese esta mañá no miradoiro de Campodola-Leixazós. Unhas das liñas de actuación dos Xeoparques Mundial da UNESCO está no ámbito educativo. Educar e formar as xeracións futuras sobre os recursos cos que conta o territorio, ademais de servir de punto de encontro e convivencia de todos os escolares do territorio Montañas do Courel, son os obxectivos que se perseguen con este Encontro dos Xeopícaros..
Está previsto que cada ano se elixa un dos Lugares de Interese Xeolóxico que forman parte do Xeoparque Mundial da UNESCO Montañas do Courel. Este ano, o emprazamento elixido é o Miradoiro de Campodola-Leixazós, xa que este lugar foi o inicio dunha longa viaxe de posta en valor do pratrimonio xeolóxico no territorio, que culminou o pasado 11 de abril co recoñecemento da UNESCO como Xeoparque Mundial para as Montañas do Courel.
Ademais de facer unha fotografía para conmemorar o encontro, os mais de 200 escolares que asisten ao mesmo, reciben explicacións do Xeológo do Xeoparque, Xosé Carlos Barros Lorenzo sobre o Pregamento Tumbado do Sinclinal do Courel, e realizan un percorrido entre as aldeas de Campodola e Leixazós.
Máis información sobre o programa da Semana dos Xeoparques Europeos na páxina http://www.courelmountains.es
