O pasado martes día 4 tivo lugar unha reunión entre José Tomé, alcalde de Monforte, e un grupo de adegueiros co obxectivo de fixar as liñas xerais dunha nova edición do Festival do Viño da Ribeira Sacra. Este evento terá lugar os días 5, 6 e 7 de xullo no Paseo do Malecón, e tentará acadar o éxito que xa colleitou nas súas dúas edicións anteriores.
Á reunión asistiron 14 adegas das 20 que xa están inscritas no festival, así como a empresa encargada da produción e desenvolvemento do evento. Os adegueiros coñeceron de primeira man toda a información sobre a organización do Festival do Viño, como os borradores do cartel e as estratexias de promoción previstas. Estes tamén puxeron sobre a mesa propostas de mellora cara ó futuro.
Segundo fontes do Concello de Monforte, a reunión discorreu “en total sintonía”, xa que todas as partes comparten un mesmo obxectivo: promocionar o viño da Ribeira Sacra e o entorno de Monforte. Durante os próximos días darase a coñecer o cartel anunciador do festival, o seu programa e o custe total do evento.
