A USC e a Deputación de Lugo organizan a II Festa da Cantarela, unha cita para poñer en valor o potencial gastronómico deste cogomelo e tamén para dar a coñecer as posibilidades económicas, medioambientais e turísticas das montañas do Courel.
Durante a xornada farase unha degustación de tapas feitas con cantarelas a cargo de Héctor López, cociñeiro do Restaurante España de Lugo.
O Deputado de Turismo en funcións, Eduardo Vidal Baamonde, explicou que “este cogomelo atópase sobre todo en soutos, sendo parte da gran biodiversidade deste tipo de monte autóctono. Temos que dar a coñecer os recursos que temos e que poden servir de atractivos turísticos e gastronómicos durante todo o ano, xa que as setas existen máis alá do outono”.
Como actividade paralela á exaltación gastronómica, a USC convocou un concurso fotográfico baixo o título: As cantarelas e as paisaxes de montaña. As obras participantes estarán expostas na Casa do Concello de Folgoso do Courel e na Estación Científica do Courel.
programa
10:30 h. Ruta guiada por itinerarios naturais da contorna. Saída dende o centro de Paderne (aira do Quintairo).
13:00-13:30 h. Inauguración amenizada con música popular.
13:30 h. Degustación popular de tapas elaboradas con cantarelas preparadas nas casas rurais do lugar e polo chef Héctor López do restaurante España de Lugo.
15:00-17:00 h. Entretemento con música e xogos tradicionais.
17:00 h. Entrega de premios do concurso fotográfico: “As cantarelas e as paisaxes de montaña”. Sorteo de rifas e entrega de agasallos.
17:30 h. Charla divulgativa e elaboración en directo ao aire libre de distintos pratos con cantarelas, a cargo do chef Héctor López.
19:00 h. Clausura da Festa.
