O físico Jorge Mira será o pregoeiro da Feira de Artesanía de Triacastela

Este sábado, 28 de setembro este concello da Comarca de Sarria organiza un encontro coa artesanía e os produtos típicos da zona.

Triacastela. Foto: Javi Pando Aira

O comezo terá lugar ás 10:00 h., momento no que se dará apertura oficial aos diferentes postos de artesanía e de produtos gastronómicos orixinarios da contorna. Durante o día poderanse realizar diferentes obradoiros relacionados coa cestería, o tear, a madeira, a cantería e o cristal.

Entre as 12:00 e as 13:00 h. haberá un pasarrúas a cargo da Charanga de Vilalba, que amenizará o recinto feiral e será a antesala ao pregón de Jorge Mira (13:00 h); coñecido físico, profesor e divulgador científico ademais de presentador da Televisión de Galicia.

A xornada de mañá rematará coa sesión vermú que ofrecerá o dúo Dolcevitamusical entre as 14:00 e as 15:00 h.

Pola tarde, volven os músicos da Charanga de Vilalba entre as 16:00 e as 18:00 h. e está programada unha obra de teatro para as 19:00 h. A compañía Lila Teatro representará “Rara Avis” no local social Fonte do Lunar, con entrada de balde para todos/as os/as asistentes.

O remate da xornada está enfocado á troula pois haberá ‘Cantos de Taberna’ polos locais da vila ata as 22:00 h. e a continuación verbena co dúo Dolcevitamusical.

A organización do evento, que chega á novena edición, corre a cargo da Asociación de Mulleres Rurais Tres Castros, a Asociación de Artesás do Tear Artelar e o Concello de Triacastela.

DEIXAR UN COMENTARIO

Please enter your comment!
Please enter your name here