A Deputada de En Marea, Paula Vázquez Verao, solicita datos desagregados das actuacións que se van impulsar na Ribeira Sacra, ademais da sinalización do Camiño de Inverno e actuacións en albergues. Desde En Marea lamentan que a Xunta non concrete cando se presentará o Plan de Xestión do BIC Ribeira Sacra e solicitan un plan detallado de actuacións, “Está ben defender a Candidatura a Patrimonio da Humanidade, pero é intolerable ignorar o espolio de bens como San Salvador de Asma, en Chantada, o deterioro de igrexas como a de Lobios, en Sober, ou que a igrexa de Santa María, a pé do Camiño, no Saviñao, sexa un vertedoiro”.
En Marea presentará emendas a estes orzamentos con petición de actuacións en bens culturais da zona, como os citados, así como fondos para impulsar un museo arqueolóxico no Courel, conservar a Ponte Vella de Monforte ou protexer o patrimonio inmaterial.
Por outra banda, En Marea lamenta que en Educación para o sur de Lugo só apareze unha partida de 25.000 euros para a ampliación do IES Val do Asma de Chantada. Esta formación política terá unha xuntaza monográfica sobre os Orzamentos da Xunta o vindeiro 7 de novembro en Monforte.
