A andaina celebrarase o domingo, 2 de febreiro, comezando ás 10:30h en San Vicente e será guiada por Rosa Ana Prieto Florines, guía oficial de Galicia, e polo arqueólogo monfortino, Iván Álvarez Merayo.
No 1885 Afonso XII outórgalle a Monforte por decreto real, o título de “cidade“, en agradecemento polos esforzos para a chegada do ferrocarril. Afonso XII inaugurara 2 anos antes, a liña férrea Monforte – A Coruña, o que fixo de Monforte o nó ferroviario de Galicia.
Monforte era a entrada do tren a Galicia e a conexión coa meseta, o que supuxo un dos principais piares de desenvolvemento socieconómico da cidade. Polo tanto a andaina rematará no barrio da Estación, onde os participantes brindarán por este 135 aniversario. “Sirva este brinde simbólico para reclamar maiores e mellores investimentos na rede ferroviaria e a reactivación comercial do barrio da Estación”, sinala Emilio J. Sánchez, voceiro do BNG en Monforte.
