Lembran que as súas reivindicacións sempre foron condicións dignas e non incrementos salariais nin doutro tipo de retribución, “Se nos remontamos á anterior crise económica: os recortes na sanidade, xunto con outros factores, aumentaron a carga de traballo. Aumentou porque a contratación e os nosos dereitos reducíronse. Sufrímolo nas nosas carnes o persoal permanente, o persoal eventual e sobre todo os pacientes coa caída inaceptable na calidade da nosa atención. A existencia de sobrecarga asistencial non é compatible cunha boa calidade da mesma.
Agora reafírmanse en que seguen solicitando o de sempre, “seguridade no noso traballo, para o que precisamos: equipos, material, formación e contratación estable. Necesidades que continuamos a ter.” Enfermeiras en Loita lémbrase do persoal non sanitario (celadoras, PSXs, TES, etc), tamén imprescindibles nesta primeira liña, “e as que esta medida podería deixar fóra.”
Enfermeiras en Loita remata así o seu comunicado: tamén entendemos que o persoal que coida ás nosas maiores (residencias, axuda a domicilio, etc..) como tamén o persoal que segue traballando para garantir o abastecemento de primeira necesidade (supermercados, transporte, farmacias, etc.) son, canda nós, esa primeira liña, polo que pedimos que as medidas que se soliciten sexan para garantir agora e sempre a seguridade de todas nós e a das nosas familias.
