O concello da Pobra do Brollón asegura que a auga do abastecemento municipal xa reúne as condicións hixiénico-sanitarias óptimas, tras emendar un problema de subministro eléctrico dunha potabilizadora que clora a auga dunha decena de parroquias.

Os temporais da semana pasada causaron unha avaría no tendido eléctrico que chega á potabilizadora en Loureiro, que o Concello solucionou na fin de semana instalando un grupo electróxeno.

Despois de recuperar o subministro eléctrico, tiveron que pasar uns días ata restablecer as condicións sanitarias óptimas da auga, debido á gran turbidez que presentaba.

A auga de toda a rede municipal xa reúne as condicións sanitarias óptimas e pódese consumir dende este mércores, con total tranquilidade.