A nova edición que se celebre da Feira do Viño marcará un antes e un despois neste evento festivo, posto que como xa se decidiu o pasado ano, a partir de agora estará aberta non só a pequenos viticultores, se non tamén ás adegas industriais da subzona Quiroga-Bibei. Por primeira vez xuntaranse na Feira do Viño de Quiroga, os caldos elaborados de maneira tradicional cos elaborados de forma industrial.

Esta é a base para que este ano sexa unha homenaxe a todos os adegueiros artesanais que pasaron por esta feira. A exposición cos carteis e as botellas que acudiron a estes certames e a publicación dunha revista conmemorativa serán algunhas das actividades que se levarán a cabo durante a Semana Santa. Tamén se contará coa colaboración dos máis pequenos a través dos seus debuxos coa convocatoria dun concurso infantil de debuxo sobre a Feira.

Esta serán algunhas das actividades que os organizadores da feira levarán a cabo nas datas nas que se tería que celebrar unha nova edición (3 e 4 de abril) pero que unha vez máis as condicións sanitarias poden modificar. De poder levarse a cabo os organizadores teñen o 24 e 25 de xullo como data escollida para celebrar a Feira do Viño de Quiroga.