O pasado sábado, 26 de marzo, realizábase a derradeira visita guiada a Monforte cun grupo de 43 persoas chegadas de diferentes lugares de Galicia. En palabras de Beatriz Vila, delegada da Asociación Provincial de Empresarios de Hostelería de Lugo (Apehl) na zona, “un pracer recibilas e un pracer traballar coas guías Gema e Rosa”, profesionais que fixeron un traballo excepcional nas diferentes xornadas guiadas que houbo ao longo do mes.
O mesmo sábado, xa pola noite, tiña lugar o acto central do ‘Cocido das Meigas’: un aquelarre que se fixo na Praza de España. Alí se xuntaron unha chea de Meigas e Meigos que, acompañadas/os da música de Batucada Creativa, foron en desfile ata o Parque dos Condes onde se procedeu á lectura do ‘Manifesto das Meigas’. A encargada foi Manuela Fuentes Rodríguez que ademais levou o premio á mellor caracterización –Meiga Maior–.
O encontro de Meigas e Meigos, na que era a súa primeira edición –por mor da pandemia non puido realizarse o pasado ano– foi un gran éxito de participación. Encheuse a Praza de España e tamén a rúa do Cardeal ao seu paso creando un gran ambiente que anima xa a pensar no ‘Cocido das Meigas 2023’. E tal como nos adiantaba días atrás Beatriz Vila, todo apunta a que será xa unha actividade fixa para o vindeiro Estase Cocendo.
Vila comentaba en Onda Cero Monforte este luns 28 de marzo que “quere afincar” esta actividade que ben podería quedar marcada no calendario para o derradeiro sábado do mes de marzo. Dicía tamén que, aínda habendo cousas a mellorar, para vindeiras edicións pénsase xa en contemplar que o ‘Cocido de Meigas’ se faga non só en Monforte senón noutros lugares da Ribeira Sacra, que inclúa un gran encontro gastronómico, xantar ou cea de meigas/os, un fin de festa…
BALANCE DA ORGANIZACIÓN
A delegación da zona sur da Asociación Provincial de Empresarios de Hostalería e Turismo de Lugo (Apehl) fixo balance desta décimo cuarta edición do Estase Cocendo e asegura que “despois de dous anos de parón, volveu con máis forza que nunca. Foi un éxito en número de cocidos, en visitas guiadas por Monforte e en participación durante a Quedada de motos e o Cocido das Meigas. Esta última fin de semana encheuse Monforte de tambores e meigas nun fin de festa multitudinario”.
Dende a organización lembran tamén que o vindeiro venres, día 2 de abril, sortearase o porco, xentileza da Asociación Prodeme. O gañador ou gañadora será quen posúa a rifa, cuxas últimas catro cifras coincida co número premiado dese día no sorteo da ONCE. O número premiado publicarase en todas as redes sociais e nas páxinas webs apehl.org e eparacomerlugo.com.
